Sprüchli

St. Niklausgesellschaft Niederglatt

Nachfolgend finden Sie einige schöne, uns auch schon vorgetragene Sprüchli...
Viel Spass

Samichlaus ech säg der eis

Samichlaus, ech säg der eis:
Es richtigsSprüchli weiss ech keis.
Ech weiss nur:
Bi gottefroo, äntli - äntli bisch du cho!
 

Äs dunklet scho

Äs dunklet scho im Tannewald und schneielet ganz lieslig,
was isch säb für äs Liechtli döt, i säbem chline Hüsli,
döt isch dä Samichlaus dihei, mit sine guete Sache,
säg Samichalus häsch du mir au öpis bachä?
     

Ich bin en chline Stumpe

Ich bi en chline Stumpe,
tue gärn chli umegumpe,
ä Lumpeornig mache
mit mine viele Sache.

Tue mängsmol gar nid lose,
ha Fläcke a de Hose,
tue vielmol umestoh
statt weidli hei-zue goh.

Doch darfsch du s Mueti froge,
ich tue keis Tierli ploge.
Drum Chlaus bis so en Guete,
verschon mi vor de Ruete!

Bring doch nur gueti Sache,
wie tätsch du Freud mir mache!
Und gäll, säb weisch sit färn,
i ha mis Mueti gärn.
 

Es nachtet scho

Es nachtet scho und s schneielet,
du liebi Zyt, ganz grüsli,
de Chlaus leit jetzt sin Mantel aa,
und bschlüsst druf na sys Hüüsli.

Er holt de Schlitte us em Schopf,
spannt s Eseli gschwind aa,
und ladet d Seck und d Fitzen uuf,
won er für d Chind mues haa.

«Hü Trämpeli», seit er «s isch Zyt,
de Weg is Stedtli isch na wyt!
Mer händ hüt Abig gar vil z tue,
hü, Trämpeli, lauf artig zue!»

Wie sind die Seck so dick und schwer,
wer chunnt ächt d Fitzen (Nüssli) über, wer?
De Chlaus weiss alles ganz genau,
drum, Chinde, bitti folged au!
     

Pfüderi

Ich bin än chliinä Pfüderi
das sägäd alli Lüüt
ich möcht so gärn än Grossä sii
doch streckä, das nützt nüt
gäll Samichlaus, das weisch du scho
chumm glich i öises Huus
und läär no vor äm Witergoo
dä Sack i'd Stubä us.
 

Es Liechtli chunnt

Es Liechtli chunnt de Feldweg i,
i glaub das mues de Samichlaus sii.
Jetzt ghört mer’s Glöggli, still los guet,
wie’s über d’ Wiese lüüte tuet,
Mis herzli chlopfet lies und fescht,
ich hoff Du weisch vo mir nur’s bescht.
Die andere chline dumme Sache,
wetti s’nägscht Jahr besser mache.
Drum bitte lueg in Sack jetzt drii,
ob’s öppis het für mich debii.
     

Samichlaus du liebe Maa

Samichlaus du liebe Maa,
gäll du wotsch es Sprüchli ha.
Samichlaus ich säg dir eis,
Ich weiss e keiss.
 

Arme Chlaus

Arme Chlaus, wie häsch's du sträng!
Gäll, dä Weg isch grüüsli lang,
zu de Chinde, zu de nette
wo so gern äs Päckli hetted!
Säg mer, langts ächt au für mi,
wänn ich ganz ä Liebi bi?
     

Was isch säb für es Liechtli?

Was isch säb für es Liechtli?
Was isch säb für en Schii?
De Chlaus mit de Latärne
lauft grad de Wald dur y.

Sin Esel, de hed glaade, er rüeft, J-a, J-a!
Hüt dörf i mit mim Meischter ämal is Stedtli ga!
Im Sack, da häts vill Nusse, au Tirggel, Zimmetschtärn,
die träg ich, wär's en Zentner, für d'Chinde na so gärn!
 

Roboter

Für vieles stellt mer hüt Roboter a,
mer seit ohni Computer chas nöd gah.
Es git Raggete und Satellite,
und doch wird uf de Erde immer no gschtritte.
Mer schafft vieles ab und tuet ume hetzte,
nur dich, Samichlaus, cha niemer ersetzte.
Du lasch dich nöd vom Moderne la leite,
und läbigi Schmutzli tüend dich begleite.
Ziesch all Jahr z'Fuess dur euses Land,
treisch immer s'rot und goldig Gwand,
für jedi Familie häsch Zit und machsch halt.
Ich danke dir im Name vo jung und alt.

Samichlaus i han e Frag:
säg, was machsch du jede Tag?
Flügsch im Summer au devo,
uf en Insle irgendwo?

Lisch mit Badhose am Strand,
hesch es Schoggiglacé i de Hand?
Gasch go fische mit dim Bart?
Machsch im Car e Stadtrundfahrt?

Oder blisch du doch lieber dihei,
i dim Wald so ganz elei?
Höcklisch gmüetli vor dim hus?
Säg, ich lache dich nöd us!
   

Samichlaus du liebe Maa


Samichlaus, du liebe Maa,
mues ich jetzt go füre staa?
Gäll, du bisch nöd bös mit mir,
weisch ich han ächli Angscht vor dir.
Gfolget hani scho nöd immer,
s'git no Sache, diä sind schlimmer!
Gäll, das wämmer jetzt vergässe,
lieber Schnitz und Bire ässe.
Gäll, ich dörf jetzt wieder gaa,
Samichlaus du liebe Maa.